Search
Maryan---Dhanush

“13 வருட காத்திருப்பு” – மரியான் தனுஷ்

ஏ.ஆர்.ரஹ்மானுடன் முதல்முறையாக இணைகிறார் தனுஷ். அதைப் பற்றிக் குறிப்பிடுகையில், இது பதிமூன்று வருட காத்திருப்பு என்கிறார். 50 அடி ஆழக் கடலினுள் நடப்பது, நமீபியா பாலைவனங்களில் வெறும் காலுடன் நல்ல வெயிலில் நடப்பது என தனுஷை இயக்குநர் பரத்பாலா சக்கையாகப் பிழிந்துள்ளார். 

“எந்தப் படத்திற்கும் இவ்வளவு கஷ்டப்பட்டதில்லை. இனி பரத்பாலா படத்தில் நடிக்கவே கூடாது என முடிவு பண்ணேன். ஆனா இப்ப ரிசல்ட்டைப் பார்க்கிறப்ப, மீண்டும் அவர் படத்தில் நடிக்கணும்னு தோணுது. படத்தில் ஒரு சீனுல சிறுத்தை வரும். அது எப்படி எடுத்தாங்கன்னா.. சிறுத்தை ஓடிடக் கூடாதுன்னு பெரிய கூண்டு ஒன்னுப் போட்டுட்டாங்க. ஒன்னு இல்லை மூனு சிறுத்தை. சும்மா கொஞ்ச நேரம் எடுக்கல. காலையில் தொடங்கி மாலை வரை, ரொம்ப கஷ்டம். ‘சீக்கிரம் மறைஞ்சுடுப்பா’ என நான் சூரியனை வேண்டிக்கிட்டேன். 

கேமிராவைக் கூண்டுக்கு வெளில வச்சுட்டாங்க. அந்த சீன்ல எனக்கு பின்னாடி ஒரு மரம் இருக்கும். அந்த மரத்தின் நிழலைப் பார்த்து சிறுத்தை பயப்படுது. நான் சிறுத்தையைப் பார்த்துப் பயப்படுறேன். வாழ்வா, சாவாங்கிற மாதிரி நிலை. டைரக்டர் வெளியில இருந்து, ‘இன்னும் கொஞ்சம் பயப்படுற மாதிரி முகத்தை வச்சுக்கோங்க’ங்கிறார். அதுக்கு மேல எல்லாம் எப்படிப் பயந்தாப்ல முகத்தை வச்சுக்கிறது? அவ்வளவு பீதி. ஆனா அவ்வளவு கஷ்டமும் வொர்த்” என தன் அனுபவத்தைப் பகிர்ந்துக் கொண்டார் தனுஷ்.

“முதலில் ஒன்னு சொல்லிக்கிறேன். நான் வெறும் பார்வதி தான். பார்வதி ‘மேனன்’ இல்லை” என்றவர் ஏ.ஆர்.ரஹ்மான், தனுஷ் போன்றோர்களுடன் இணைந்து வேலை செய்தததை பாக்கியமாகக் கருதுகிறார். கிராமத்துப் பெண்ணாக தத்ரூபமாக நடிக்க, கிராமங்களில் தங்கி பயிற்சிப் பெற்றுள்ளார்.  இந்தப் படத்தின் கதை தான் ஹீரோ என்கிறார் பார்வதி.

“காதல், பிரிவு, வலி, உறுதி, எழுச்சி எனப் படத்தை பரத்பாலா பிரிச்சுள்ளார். நான் அதுலாம் பார்க்கலை. அப்படியே மியூசிக் பண்றேன். இந்தப் படத்துக்கு நான் கதையே கேட்கலை. எங்களுக்குள்ள அப்படியொரு கண்டிஷன். எப்படியும் தனுஷ் கதை கேட்டு தான ஓ.கே. பண்ணியிருப்பார். எல்லாம் ஒரு கால்குலேஷன் தான். படத்துல வாலி, கபிலன், குட்டி ரேவதி லிரிக்ஸ் எழுதியிருக்காங்க. அப்புறம் தனுஷ் ஒரு பாட்டு எழுதணும்னு ஆசைப்பட்டார். எல்லோரும் ஒரு மணி நேர டைம்ல எழுதிக் கொடுத்துட்டாங்க. சிம்ப்ளிஸ்ட்டிக்கா இல்லாம வரிகள் சிம்பிளாக ஒரு மாதிரி நல்லா அமைஞ்சிடுச்சு. யுவன்ஷங்கர் ராஜா ஒரு பாட்டு பாடியிருக்கார். தனுஷ், செல்வராகவன், யுவன் மூனு பேரும் பண்ண வொர்க் பார்த்திருக்கேன். யுவன் ஒன்றரை மணி நேரத்தில் ஃபாஸ்ட்டா பாடிக் கொடுத்துட்டு போயிட்டார்” என்றார் ஏ.ஆர்.ரஹ்மான்.


“நான் மயிலாப்பூர்க்காரன். முதல்ல ஒரு ஹிந்திப் படம். அப்புறம் ஏழு வருஷத்துக்கு அப்புறம் ரெண்டவதா இப்ப தமிழ்ப் படம் பண்றேன். எனக்கு தலைலாம் நரைச்சிடுச்சி. ஒரு படம் பண்ணனும்னுலாம் இல்லை. இந்தக் கதை பண்ணியே ஆகணும்னு ஃபேஷனேட் டெவலப் ஆனா பண்ணிடுவேன். அப்படித் தான் மரியானும். சூடான்ல நடந்த ஒரு உண்மை சம்பவத்தை வச்சு பண்ண ப்ளாட். தனுஷ், பார்வதி கிட்ட கேட்டா நான் டார்ச்சர் பண்ணதா சொல்வாங்க. அது கொஞ்சம் உண்மையா இருக்கலாம். ஆனா தனுஷ் பேசும் பொழுது ஒன்னு சொல்லாம விட்டார். அவர் கூட நானும் கடலில் இறங்குவேன். அந்த சிறுத்தை சீன் எடுக்கும் முன், என் க்ரூ மெம்பர்சுக்கு கான்ஃபிடன்ஸ் வர நான் சிறுத்தையை தடவி கொடுத்து, அதன் வாய்க்குள் கையெல்லாம் விட்டேன். ரஹ்மானும் நானும் ப்ரெண்ட்ஸ் என்பதால், வொர்க் எதுவும் டைட்டாக போகாம ஃப்ரீயா வொர்க் பண்ணுவோம். இந்தப் படத்துக்கு கேமிரா மேன் மார்க் கோனிக்ஸ் என்ற ஃப்ரெஞ்சுக்காரர். அவரோட படம் ஒன்னு பார்த்தேன். ஃபோன் நம்பர் கண்டுபிடிச்சு அவர்கிட்ட கதையை சொன்னேன். இரண்டாவது நாள் அவரே கிளம்பி வந்துட்டார். இப்படிக் கதை எல்லோரையும் ஈர்த்துடுச்சு” என்றார் பரத்பாலா.

பாடல் வெளியிடப்பட்ட கொஞ்ச நாளிலேயே ஐ-ட்யூன்சில் நான்காவது இடமும், இணையத்தில் இருபத்தாறு லட்சத்திற்கும் மேலாக லைக்சும் பெற்றுளது மரியான்.




Leave a Reply