ARM-about-Sanaa-fi

“அடுத்த சிம்ரன்!” – இயக்குநர் ஏ.ஆர்.முருகதாஸ்

Gautam karthick - Sanaa

ஃபாக்ஸ் ஸ்டார் ஸ்டுடியோஸும், ஏஆர் முருகதாஸ் புரொடக்ஷன்ஸும் இணைந்து தயாரித்துள்ள படம் ரங்கூன். கௌதம் கார்த்திக், சனா நடிக்க முருகதாஸிடம் உதவியாளராக இருந்த ராஜ்குமார் பெரியசாமி இயக்கியுள்ளார். அறிமுக இசையமைப்பாளர் R.H.விக்ரமும், விஷால் சந்திரசேகரும் இசையமைத்துள்ள இந்தப் படத்தின் இசை வெளியீடு சென்னையில் நடைபெற்றது. விழாவில் இயக்குநர் ஏ.ஆர்.முருகதாஸ் கலந்து கொண்டு இசைத்தட்டினை வெளியிட்டார்.

“இரட்டையர்கள் என்றாலே ஒரு மேஜிக் மாதிரி தான். அவர்களுடன் இந்தப் படத்தில் பணியாற்றியது ஒரு புது அனுபவம். குத்துப்பாட்டுக்கு டான்ஸ் ஆடுறதுக்கு எனக்கு எப்பவுமே பயம். ஆனால் இந்தப் படத்தில், என்னைப் போலவே இருக்கும் ரொம்ப கூலான சதீஷ் மாஸ்டர் தயவால் குத்துப் பாட்டுக்கும் ஆடியிருக்கிறேன். இயக்குநர் ராஜ்குமார் சில முக்கிய தருணங்களில் நான் தான் நடிக்கணும் என எனக்காக நின்றார். ரொம்ப அன்பானவர். தெளிவான இயக்குநர்” என்றார் நாயகன் கௌதம் கார்த்திக்.

“வழக்கமா நடக்கிற மாதிரி கதை கேட்டு நான் இந்தப் படத்துக்கு ஒப்பந்தம் ஆகலை. இயக்குநர் ராஜ்குமார் பெரியசாமி என் நண்பர். படத்தை போட்டுக் காட்டினார். படத்துக்கு பின்னணி இசை அமைக்கச் சொன்னார். கூடவே படத்தில் இரண்டு பாடல்களுக்கும் இசையமைத்தேன். அவை இரண்டும் படத்தில் அமைந்திருப்பது மகிழ்ச்சி. படத்தில் வரும் பயணத்தைப் பின்னணி இசையின் மூலம் நகர்த்தியிருக்கிறேன். பர்மீஷ் மொழி பாடல் வரிகளையும் உபயோகப்படுத்தி இருக்கிறோம்” என்றார் இசையமைப்பாளர் விஷால் சந்திரசேகர்.

“இங்க வாய்ப்புக் கிடைச்சவங்க, வாய்ப்புக் கிடைக்காதவங்க என இரண்டு பிரிவுதான். எனக்கு ஒரு வாய்ப்பைக் கொடுத்திருக்கிறார் முருகதாஸ். அவருக்கு உதவி இயக்குநர்கள் தான் குடும்பம். உதவி இயக்குநர்களுக்கு என்ன உதவினாலும் முதல்ல வந்து நிற்பவர். அவரிடம் வேலை செய்தால் படம் இயக்கி விடலாம். அவர் இந்த மாதிரி படம் தயாரிக்கிறதுக்கு முக்கிய காரணம் நிறைய திறமையானவர்களை அறிமுகப்படுத்துவதற்குத்தான்.

கௌதம் கார்த்திக் தன் எல்லைகளில் இருந்து வெளியே வந்து ரொம்ப மெனக்கெட்டு நடித்திருக்கிறார். ஊட்டி கான்வெண்ட்ல படிச்சவர், வடச்சென்னை இளைஞராகக் கஷ்டப்பட்டு நடித்திருக்கிறார். குறைந்த பட்ஜெட்டில் படத்தை எடுத்தாலும், படத்தின் உண்மைத் தன்மைக்காக கடுமையாக மெனக்கெட்டிருக்கிறோம். படத்தின் தலைப்புப் பாடலான யாத்ரீகா என்ற பாடலை நா. முத்துகுமார் எழுதிக் கொடுத்தார்” என்றார் இயக்குநர் ராஜ்குமார் பெரியசாமி.

“இயக்குநர் ராஜ்குமார் என்னிடம் வேலை செய்தாலும், செய்யாவிட்டாலும் எனக்காக வந்து என் படங்களுக்கு உதவி செய்பவர். ஒரு முதல் பட இயக்குநரின் படத்தை நான் தான் தயாரிப்பேன் என் இரண்டு தயாரிப்பாளர்கள் போட்டி போட்டு நின்றார்கள். அந்த வாய்ப்பு எங்களுக்கு அமைந்தது. சிலர் உதவி இயக்குநர் ஆவதற்கு ரொம்ப கஷ்டப்படுவார்கள். ஒரு சிலர் இயக்குனர் ஆவதற்கு ரொம்ப கஷ்டப்படுவார்கள். ராஜ்குமார் இரண்டுக்குமே ரொம்ப கஷ்டப்பட்டார். புதுப்புது இடங்களாக தேடித்தேடி, திரையில் தான் நினைத்ததைக் கொண்டு வர ரொம்பவே கஷ்டப்பட்டிருக்கிறார். சின்ன திரையில் இருந்து வந்து இயக்குநராகி இருக்கும் ராஜ்குமார் வெற்றி பெற்றால் தான் அவரைப் போல முயற்சி செய்து வரும் பலருக்கும் நம்பிக்கை வரும். நாயகன் கௌதம் கார்த்திக் படத்துக்காக தன் நிறத்தை மாற்றி, பாடி லாங்குவேஜ் மாற்றி நடித்துள்ளார். சிம்ரனின் முதல் படத்தில் நான் உதவி இயக்குநராக வேலை செய்திருக்கிறேன். அதை வைத்துப் பார்க்கையில், இந்தப் படத்தில் நாயகி சனா, சிம்ரன் விட்டு சென்ற இடத்தைப் பிடிப்பார் என நம்புகிறேன். நல்ல படங்களைக் கொடுக்கும் நோக்கத்தில் செயல்பட்டு வரும் ஃபாக்ஸ் ஸ்டார் நிறுவனத்துக்கு தமிழ் சினிமா சார்பில் நன்றி தெரிவித்துக் கொள்கிறேன்” என்றார் ஏ.ஆர்.முருகதாஸ்.

ஃபாக்ஸ் ஸ்டார் தலைமை நிர்வாகி விஜய் சிங், நாயகி சனா, படத்தின் இன்னொரு இசையமைப்பாளர் விக்ரம், நடன அமைப்பாளர் சதிஷ், சண்டைப்பயிற்சியாளர்கள் அன்பறிவு (அன்பு, அறிவு – இரட்டையர்கள்) ஆகியோரும் கலந்து கொண்டனர்.

Comments

comments