தமிழ் சினிமாவில் கவர்ச்சி நடிகைகளின் காலம் சில வருடங்கள் மட்டும் தான். எவ்வளவு தான் கவர்ச்சி காட்டினாலும் ஒரு சில கவர்ச்சி நடிகைகளைத் தவிர மற்ற அனைவரும் காலப்போக்கில் மறைந்து போய்விட்டனர். ஆனால், நடிகை சோனாவோ சற்று வித்தியாசமானவர்.
குசேலன், பத்துக்கு பத்து உள்ளிட்ட பல படங்களில் படு கவர்ச்சியாக நடித்திருப்பார். சில படங்களில் நடிகர் வடிவேலு மற்றும் விவேக்குடன் ஜோடியாக நடித்து நகைச்சுவையும் செய்திருப்பார்.
சில காலமாக கவர்ச்சி வேடங்களில் நடிக்காமல் ஒதுங்கி நல்ல வாய்ப்புக்காகக் காத்திருந்த அவருக்கு மலையாளத்தில் நல்ல வாய்ப்புகள் வரவே ‘ஒப்பம்’ போன்ற மலையாளப் படங்களில் நல்ல கதாபாத்திரங்கள் ஏற்று மலையாளத் திரையுலகில் நல்ல வரவேற்பைப் பெற்றார். மேலும் தமிழில் நல்ல வாய்ப்புக்காகக் காத்திருந்த பொழுது ஸ்டார் குஞ்சுமோன் தயாரிப்பில் வி.விநாயக் நடிப்பில் அவதாரவேட்டை படத்தில் நெகடிவ் கதாபாத்திரத்தில் நடிக்க அணுகியுள்ளனர். கதையும் கதாபாத்திரமும் பிடித்துப் போனதாலும், இதுவரை தான் ஏற்றிராத கதாபாத்திரமாக இருந்ததாலும் நடிக்க ஒப்புக்கொண்டார்.
அவதார வேட்டை கடந்த வெள்ளிக்கிழமை பிப்ரவரி 8 ஆம் தேதி வெளிவந்தது. மேலும் இவர் ஏற்றிருந்த கதாபாத்திரமும், இறுதிக்காட்சியில் வரும் சண்டை காட்சியும் மிகுந்த வரவேற்பைப்பெற்றது. இந்தக் கதாபாத்திரத்திற்குக் கிடைத்துள்ள வரவேற்பால், இனி வரும் காலங்களிலும் நல்ல கதாபாத்திரங்கள் உள்ள கதைக்கு முக்கியத்துவம் தரவுள்ளதாகக் கூறியுள்ளார்.