‘கேம் ஆஃப் லோன்ஸ்’ என்பது அபிஷேக் லெஸ்லி எழுதி இயக்கிய உளவியல் சார்ந்த திரைப்படமாகும். படத்தின் தலைப்பும், ஃபர்ஸ்ட்-லுக் போஸ்டரும் ஐஸ்வர்யா ராஜேஷால் ஆகஸ்ட் 13 அன்று வெளியிடப்பட்டது. JRG புரொடக்ஷன்ஸ் சார்பில் N. ஜீவானந்தம் தயாரித்த இந்தப் படத்தில் நிவாஸ் ஆதித்தன், ஈஸ்தர் நொரனா, அபினய் கிங்கர், ஆத்விக் ஜலந்தர் முதலியோர் முக்கிய வேடத்தில் நடிக்கின்றனர். பெரும்பாலும் ஒரே இடத்தில் அமைக்கப்பட்ட இந்தக் கதை, ஒரு நாள் முழுவதும் போதை, கடன் மற்றும் உளவியல் முறிவு ஆகிய கருப்பொருள்களை மையமாகக் கொண்டு திரைக்கதை பயணிக்கிறது.
ஆன்லைன் சூதாட்டத்தில் ஏற்படும் உடனடி திருப்தியில் இன்பம் காணும் வேலையில்லாத டேனியலைப் சுற்றிப் படம் நகர்கிறது. ஒரு சாதாரண நாளில், அவரது மனைவியும் குழந்தையும் வெளியில் சென்றிருக்கும்போது, டேனியலின் அன்றாட வழக்கமான சூதாட்டத்தின் போது, அவரது வீட்டு வாசலில் ஒரு கூர்மையான, விவரிக்க முடியாத சத்தம் கேட்கிறது. லேசான ஆர்வத்தால் உந்தி, அது பதட்டமாக வளர்ந்து எதிர்பாராத சம்பவமாக முடிகிறது. திடீரெனத் தோன்றும் அந்நியர்கள், டேனியலை டிஜிட்டல் உலகத்திற்கு அப்பாற்பட்ட ஓர் ஆபத்தான விளையாட்டுக்குள் இழுத்துச் செல்கிறார்கள்.
‘துள்ளுவதோ இளமை (2002)’ படத்தில் தனுஷுடன் இணைந்து அறிமுகமான அபினய், வில்லன் பாத்திரத்தில் நீண்ட நாட்களுக்குப் பின் நடிக்கிறார். பதினான்கு நாட்களில் படப்பிடிப்பு முடிந்த இப்படம், பெங்களூருவில் ஓர் அப்பார்ட்மென்ட்டுக்குள் படமாக்கப்பட்டுள்ளது. கதாநாயகனின் மனநிலையைப் பிரதிபலிக்கும் வகையில் ஒளிப்பதிவில் வண்ணக்கலவையைப் பயன்படுத்தியுள்ளனர். ஜோ கோஸ்டாவின் இசையும், சூதாட்டத்தின் மீதான டேனியலின் பலவீனத்தையும், அவரது நிலையற்ற மனதையும் பிரதிபலிக்கும் வகையில் அமைக்கப்பட்டுள்ளது.
ஒரு பழக்கத்திற்கு அடிமையாதல், பொருளாதார விரக்தி, உளவியல் ரீதியாகத் தூண்டப்படுதல் ஆகிய மூன்றும் இணையும் புள்ளியைக் கருவாகத் தொட்டுள்ளார் இயக்குநர் அபிஷேக் லெஸ்லி. தொழில்நுட்பம் எப்படி மனிதனைச் சூதாட்டத்திற்குள் இழுத்து அடிமைப்படுத்துகிறது, கடன் கொடுக்கும் நிறுவனங்களின் வேட்டை மனநிலை, குடும்பங்களில் ஏற்படும் உணர்வுரீதியிலான பாதிப்பு போன்றவற்றை படத்தின் திரைக்கதை அலசுகிறது. ‘கூவம் (2012)’, ‘சமஸ்கிருதம் (2015)’ ஆகிய ஆவணப்படங்களையும், ‘மனம்புரியா (2017)’, ‘AI (2021)’ ஆகிய குறும்படங்களையும், ‘மறைபொருள் (2018)’ எனும் பைலட் படத்தையும் இயக்கியுள்ளார் அபிஷேக் லெஸ்லி.
