சுய விழிப்புணர்வு மற்றும் தொழில்சார் சுயதீனமான முடிவுகளை எடுக்கும் ஆற்றலை வளர்க்கும் மேம்பாட்டு மையமான ஞான சஞ்சீவனம் குருகுலம் அமைப்பின் நிறுவனரும், வாழ்க்கை முறை வழிகாட்டியும், ஊக்கமளிக்கும் நம்பிக்கை பேச்சாளருமான ஸ்ரீ சசி குமார், கோயம்புத்தூரில் ‘பெரிதினும் பெரிது கேள் 2026’ என்ற வணிக மாநாட்டு (Business Conclave) நிகழ்ச்சியை அடுத்த மாதம் (அக்டோபர்) ஏற்பாடு செய்துள்ளார். வரவிருக்கும் இந்நிகழ்வையொட்டி, அதற்காகவே பிரத்தியேகமாக நடிகர் பிளாக் பாண்டி இசையமைத்த ஆல்பத்தை, மூத்த இசையமைப்பாளர் தேனிசைத் தென்றல் தேவா தனது ரெக்கார்டிங் ஸ்டுடியோவில் வெளியிட்டார். இவ்வணிக மாநாட்டிற்கு, பிளாக் ஷீப் நிறுவனம் டிஜிட்டல்/ஊடகப் பங்காளராகச் செயற்படுகிறது.
இந்த ஆல்பத்தை வெளியிட, இசையமைப்பாளர் தேவாவைத் தேர்ந்தெடுத்ததற்கான காரணம் குறித்து, “தேவாவின் இசை எப்போதும் அவரது அனைத்துப் படைப்புகளிலும் நீரையும் காற்றையும் கலந்தே வைத்திருக்கிறது. இந்த இரண்டு கூறுகளும் மனிதர்கள் மீது பெரும் தாக்கத்தை ஏற்படுத்தும் ஐம்புலன்களின் முக்கிய அங்கமாக இருப்பதாலும், தேவாவின் இசையமைப்புகள் இந்த இரண்டு கூறுகளையும் உள்ளடக்கியுள்ளதாலும், அவர் இந்த ஆல்பத்தை வெளியிடுவதுதான் முற்றிலும் பொருத்தமானது. இந்த வணிக மாநாட்டை நடத்துவதன் நோக்கம், மக்கள், வேலையைத் தேடுவதை விட, அவர்களாகவே தங்களுக்கான வேலைவாய்ப்பை உருவாக்குவதுதான்” என்றார் ஸ்ரீ சசி குமார்.
இந்த ஆல்பத்திற்கு இசையமைத்துள்ள பிளாக் பாண்டி, “கி.மு., கி.பி. என்று சொல்வது போல, ஞான சஞ்சீவனம் குருகுலத்தின் நிழலில் இருக்கும் பாக்கியம் எனக்குக் கிடைத்திருப்பதால், என் வாழ்க்கையை ‘குருகுலத்திற்கு முன்’, ‘குருகுலத்திற்குப் பின்’ என்று என்னால் உறுதியாகப் பிரிக்க முடியும்” என்றார்.
‘தேனிசைத் தென்றல்’ தேவா, “நான் மேல்மருவத்தூர் பங்காரு அடிகளாரின் தீவிர பக்தன். எனக்கு நீருடன் ஒரு தொடர்பு இருக்கிறது என்று அவர் அடிக்கடி கூறுவார். இதற்கு முன்பு ஒருமுறை, நான் வறட்சியால் பாதிக்கப்பட்ட ஒரு ஊருக்குச் சென்றிருந்தேன்! அவ்வூர் அம்மனிடம், நான் மனப்பூர்வமாக வேண்டிக்கொண்டேன். உடனே அந்தப் பகுதியில் மழை பெய்தது. அதற்கு நான் உரிமை கொண்டாடவில்லை, அதை ஒரு தற்செயலான நிகழ்வாகவே நான் கருதுகிறேன்!
விஷயங்கள் நமக்குச் சாதகமாக நடக்கும் போது நாம் எப்படிப்பட்ட மனநிலையில் இருக்கிறோமோ, அதே மனநிலையை விஷயங்கள் தவறாகப் போகும் போதும் நாம் பராமரிக்க வேண்டும். எல்லா நேரங்களிலும், எல்லாச் சூழ்நிலைகளிலும் நிதானமாக இருப்பதற்கான ரகசியம் இதுதான்” என்றார்.
