Shadow

“இந்திக்கு எஸ்; இந்தித் திணிப்புக்கு மட்டுமே நோ” – உதயநிதி ஸ்டாலின் | லால் சிங் சத்தா

நடிகர் ஆமிர்கான் தயாரிப்பில் ஆகஸ்ட் 11 ஆம் தேதி முதல் தமிழ், இந்தி, தெலுங்கு ஆகிய மொழிகளில் வெளியாகும் திரைப்படம் ‘லால் சிங் சத்தா’. ஆமிர்கான் ப்ரொடக்ஷன்ஸ், வயாகாம் 18 ஸ்டுடியோஸ் ஆகிய நிறுவனங்கள் இணைந்து பிரம்மாண்டமான பொருட்செலவில் தயாரித்திருக்கும் இதில் ஆமிர்கான் கதையின் நாயகனாக நடிக்க, அவருக்கு ஜோடியாக பாலிவுட் நடிகை கரீனா கபூர் கான் நடித்திருக்கிறார். இவர்களுடன் நாக சைதன்யா, மோனா சிங் உள்ளிட்ட பலர் முக்கிய வேடங்களில் நடித்திருக்கிறார்கள். சத்யஜித் பாண்டே ஒளிப்பதிவு செய்திருக்கும் இந்தத் திரைப்படத்திற்கு ப்ரீதம் இசையமைத்திருக்கிறார். ஃபாரஸ்ட் கம்ப் எனும் ஆங்கிலப் படத்தினைத் தழுவி அதுல் குல்கர்னி திரைக்கதை எழுத, அத்வைத் சந்தன் படத்தை இயக்கி இருக்கிறார். இந்தத் திரைப்படத்தைத் தமிழகம் முழுவதும், தமிழின் முன்னணி திரைப்பட வெளியீட்டு நிறுவனமான ரெட் ஜெயன்ட் மூவிஸ் பிரம்மாண்டமாக வெளியிடுகிறது. சென்னை சத்யம் திரையரங்க வளாகத்தில் இப்படத்தின் பத்திரிக்கையாளர் சந்திப்பு நடைபெற்றது.

ரெட் ஜெயன்ட் மூவிஸ் உதயநிதி ஸ்டாலின், ”நான் பள்ளியில் படித்துக் கொண்டிருந்த காலத்தில் வகுப்பைக் ‘கட்’டடித்துவிட்டு ஆமிர் கானின் ‘ரங்கீலா’ படத்தைப் பார்த்திருக்கிறேன். அந்த அளவிற்கு நான் ஆமிர் கானின் ரசிகன்.

மாதந்தோறும் இரண்டு திரைப்படங்களையாவது ரெட் ஜெயன்ட் மூவிஸ் வெளியிடுகிறது. இதனைத் தவிர்ப்பதற்கு பலமுறை முயற்சி செய்தாலும், திரையுலக நண்பர்களுக்காக தரமான படங்களைத் தொடர்ந்து வெளியிட்டு வருகிறோம். அந்தத் தருணத்தில் ஆமிர்கான் தயாரிப்பில் உருவாகி இருக்கும் ‘லால் சிங் சத்தா’ படத்தினைத் தமிழில் வெளியிடுவதற்காக எங்களைத் தொடர்பு கொண்டார்கள். நாங்கள் அதை முதலில் வேண்டாம் என்று மறுக்க நினைத்தோம். தமிழ்த் திரைப்படங்களே போதும். இந்தித் திரைப்படங்கள் வேண்டாம் என்றும் எண்ணினோம்.

திடீரென்று ஒரு நாள் ஆமிர் கான் வீடியோ காலில் தொடர்பு கொண்டு, ‘லால் சிங் சத்தா’ படத்தினை நீங்கள் வெளியிட வேண்டும் என கோரிக்கை வைத்தார். உடனே சரி என்று ஒப்புக் கொண்டேன். அதன் பிறகு படத்தை முழுவதும் பார்த்தோம். ஃபாரஸ்ட் கம்ப் படத்தில் அமெரிக்க ஹிஸ்ட்ரி பற்றி பின்னணியில் வந்துட்டே இருக்கும். அதே போல், இந்தப் படத்தில் இந்திய வரலாறு பற்றியும் வருது. நான் சில இடத்தில், ‘இது எப்படி சார்?’ எனக் கேட்டு சில திருத்தங்கள் சொன்னேன். அதை ஏற்றுக் கொண்டு அவரும் சிலது மாத்தியிருக்கார்.  முன்னோட்டத்தில் பார்த்து ரசித்ததை விட, திரைப்படம் இன்னும் சிறப்பாக இருக்கிறது. ஆமிர்கான் அர்ப்பணிப்புடன் கூடிய ஒரு சிறந்த நடிகர் என்பதை மீண்டும் இந்தப் படத்தில் நிரூபித்திருக்கிறார். பான் இந்தியா என்ற வார்த்தையை தற்போது தான் நாம் பெருமளவில் பயன்படுத்தி வருகிறோம். ஆனால் ஆமிர்கான் இருபது ஆண்டுகளுக்கு முன்னரே இதனை அறிமுகப்படுத்தி, வெற்றி பெற்றிருக்கிறார்.

நான் அமீர்கானின் ரசிகன். இதன் காரணமாகவே அவரது நடிப்பில் வெளியாகும் ‘லால் சிங் சத்தா’ திரைப்படத்தை தமிழக முழுவதும் வெளியிடுகிறோம் என எண்ண வேண்டாம். லால் சிங் சத்தா படைப்பு, அனைவரும் கண்டு ரசிக்க வேண்டிய நேர்த்தியான படைப்பு” என்றார்.

இந்தி பற்றிய எதிர்மறைப் பிரச்சாரத்தை முன்னெடுக்கும் தருவாயில், ரெட் ஜெயன்ட் மூவிஸ் இப்படத்தை வெளியிடுவது பற்றிய பத்திரிகையாளரின் கேள்விக்கு, “ஒரு மொழியைக் கற்றுக் கொள்ளவேண்டாம் என்று எப்பொழுதும் சொன்னதில்லை. அது கட்டாயமாகத் திணிக்கப்படும் போட்ஹே அதை எதிர்க்கிறோம்” என்று தெளிவுப்படுத்தினார் உதயநிதி ஸ்டாலின்.