ப்ளூ ஸ்டார் வெற்றியைத் தொடர்ந்து லெமன் லீஃப் கிரியேசன்ஸ் தயாரிப்பில் வெளியாகும் இரண்டாவது படமான மலை செப்டம்பர் மாதம் வெளியாகிறது. இப்படத்தை லெமன் லீஃப் கிரியேசன்ஸ் தயாரிப்பாளர் R.கணேஷ்மூர்த்தியும், சவுந்தர்யா கணேஷ்மூர்த்தியும் தயாரித்துள்ளனர். யோகிபாபு, லக்ஷ்மி மேனன், காளிவெங்கட் மற்றும் அறிமுக குழந்தை நட்சத்திரம் சதுர்த்திகா கணேஷ்மூர்த்தி நடித்திருக்கும் இப்படத்தை அறிமுக இயக்குனர் IP முருகேஷ் இயக்கியிருக்கிறார்.
மனித வாழ்வானது இயற்கையோடு இணைந்தது. மனிதர்களைப் போல விலங்குகளும் தாவரங்களும் மலைகளும் ஆறுகளும் நீர்நிலைகளும், இந்த பூமியில் அதிமுக்கியமானதாக இருக்கிறது. அதீத மனித ஆசையால் இயற்கையை மெல்ல மெல்ல மனிதர்கள் தங்கள் சுயநலத்திற்காக அழித்து வந்துள்ளார்கள்.
தமிழக மலைக்கிராமம் ஒன்றில் நடக்கும் இந்தக் கதை மனிதனின் சுய நல கோரப்பசிக்கு இயற்கையின் பதில் என்ன என்பதைப் பற்றிய ஒரு படைப்பாக வந்திருக்கிறது. மனிதன் முதலில் தன் சுய நலத்துக்காக சுரண்ட ஆரம்பித்தது சக மனிதனிடமிருந்துதான். அப்படி இரக்கமில்லாமல் சுரண்ட ஆரம்பிக்கும் மனிதன் மெல்ல மெல்ல இயற்கை வளங்களைச் சுரண்ட ஆரம்பிக்கிறான். இதிலிருந்து தப்பிக்க அதிகாரம், அரசியல், மதம், சாதி , இனம் போன்றவற்றின் பின்னால் நின்றுகொள்கிறான். சக மனிதர்கள் மீதான அன்பை மறந்து எதிர்கால சந்ததியினரின் வாழ்வைக் குறித்துக் கவலைப்படாமல் மனித பேராசை இயற்கையை மொத்தமாக இன்று அழிவின் விளிம்பில் கொண்டு வந்து நிறுத்தியிருக்கிறார்கள்.
தேனி ஈஸ்வர் ஒளிப்பதிவு செய்திருக்கிறார். இமான் இசையமைத்திருக்கிறார். செப்டம்பர் மாதம் வெளியாகும் இத்திரைப்படத்தின் பாடல்கள் இன்னும் சில தினங்களில் வெளியாகிறது.
