‘ஸ்பைடர் மேன்: அக்ராஸ் தி ஸ்பைடர் வெர்ஸ்’ படத்தின் ட்ரெய்லர், 9 இந்திய மொழிகள் உட்பட 10 மொழிகளில் வெளியாகியுள்ளது. ஆங்கிலம், இந்தி, தமிழ், தெலுங்கு, கன்னடம், மலையாளம், குஜராத்தி, மராத்தி, பஞ்சாபி மற்றும் பெங்காலி ஆகிய மொழிகளில் வெளியாகின்றன.
இந்திய சினிமா வரலாற்றில் முதன்முறையாக, அனைவராலும் ஆர்வத்துடன் எதிர்பார்க்கப்படும் பிரபலமான ஸ்பைடர்மேன் வரிசையைச் சார்ந்த ஹாலிவுட் திரைப்படம், 10 வெவ்வேறு மொழிகளில் திரையரங்குகளில் வெளியாகவுள்ளது. இந்தியாவில் அனைத்து வயதினருக்கும் பிடித்தமான ஸ்பைடர் மேன் வரிசை படங்கள், இந்திய பாக்ஸ் ஆஃபிஸில் மகத்தான வெற்றியைக் கண்டது. ஸ்பைடர் மேனுக்கு நாடு முழுவதும் உள்ள தீவிரமான ரசிகர்களைக் கருத்தில் கொண்டு, தயாரிப்பாளர்கள் அவரை அனைத்து இந்தியர்களுடனும் நெருக்கமாகக் கொண்டு வருவதற்கான ஒரு தனித்துவமான வழியைக் கையாண்டு, இதை ஒரு பான்-இந்தியா திரைப்படமாக விளம்பரப்படுத்தி வருகிறார்கள்.
சோனி பிக்சர்ஸ் ரிலீசிங் இன்டர்நேஷனல் (SPRI) இந்தியத் துறையின் பொது மேலாளரும் தலைவருமான ஷோனி பஞ்சிகரன், “ஸ்பைடர் மேன் இந்தியாவில் அனைவராலும் மிகவும் விரும்பப்படும் சூப்பர் ஹீரோ ஆவார். ஸ்பைடர் மேன் வரிசையில் வரும் எந்தப் படமாகினும், வெளியீட்டின் பொழுது தேசம் முழுவதும் அது கொண்டாட்டமாக மாறுகிறது. இறுதியாக வந்த ஸ்பைடர் மேன் திரைப்படம், ‘நோ வே ஹோம்’, ஸ்பைடர் மேனின் ரசிகர்களை மேலும் தீவிர ரசிகர்களாக மாற்றியுள்ளது. இந்தியாவில் உள்ள ஒவ்வொரு குடும்பமும் தங்களுக்குப் பிடித்த சூப்பர் ஹீரோவைச் சொந்த மொழியில் கண்டு அனுபவிக்க வேண்டும் என்று நாங்கள் விரும்புகிறோம். அதனால் ‘ஸ்பைடர் மேன்: அக்ராஸ் தி ஸ்பைடர் வெர்ஸ்’ திரைப்படத்தை 10 மொழிகளில் வெளியிடுவதில் பெருமிதம் கொள்கிறோம். இந்தியா, ஸ்பைடர் மேனை விரும்புகிறது. மேலும் இந்திய ஸ்பைடர் மேன் பவித்ர பிரபாகர் உட்பட, பல இந்தியக் கூறுகளை அறிமுகப்படுத்தியதன் மூலம் இவ்வெளியீடு எங்களுக்கு மிகவும் சிறப்பு வாய்ந்தது. நாடு முழுவதும் உள்ள பார்வையாளர்கள் இப்படத்தை மிகவும் விரும்புவார்கள் என்று நாங்கள் உறுதியாக நம்புகிறோம்” என்றார்.
மைல்ஸ் மோரல்ஸ், ஆஸ்கார் விருது பெற்ற ஸ்பைடர்-வெர்ஸ் சாகாவின் அடுத்த அத்தியாயமான ‘ஸ்பைடர் மேன்: அக்ராஸ் தி ஸ்பைடர் வெர்ஸ்’ திரைப்படத்தில் மீண்டும் தோன்றுகிறார். க்வென் ஸ்டேசியுடன் மீண்டும் இணைந்த பிறகு, புரூக்ளினின் முழுநேர, அனைவருக்கும் நண்பனான ஸ்பைடர் மேன் மல்டிவெர்ஸுக்கு அனுப்பப்படுகிறார். அங்கு தங்கள் இருப்பைப் பாதுகாக்கும் பொறுப்பைக் கொண்டுள்ள ஸ்பைடர்-பீப்பிள் குழுவை அவர் சந்திக்கிறார். இத்திரைப்படத்தின் சிறப்பு என்னவென்றால், இந்திய ஸ்பைடர் மேன், பவித்ர பிரபாகர், மும்பட்டன் தெருக்களில் இருந்து அறிமுகமாகிறார்.
ஜூன் 2, 2023 அன்று திரையரங்குகளில் இப்படம் வெளியாகிறது.
